ini bukan facebook

Jiwa Online
Pemilik Blog: Ampuan Awang  Berkhidmat dalam: Kerajaan Malaysia (Tukang Kebun). Mana tinggal? Di Kepala Batu, Antartika Edit Profile
  Post To:
anyone or anywhere  

Pantun Moden Dan Pantun Lama Dalam Laras Brunei

++ Nota: Adapun pantun-pantun ini sengaja dibawakan kembali dalam blog sebagai ingatan bahawa pantun berlaras Brunei masih hidup walaupun orang yang mengalunkannya hampir pupus di dunia (dengan bangganya aku berkata begitu).Ucapan setinggi-tinggi terima kasih buat pak cik ku (dia bukannya tahu aku menyalin pepantunnya ini. aduh!)

Tidur malam badudun-dudun
Anak damit jual sairupa
Sudah lama tidak barpantun
Antah kan ingat antah kan lupa

Tarah papan bagulung tatal
Pangayuh barat gubangnya miris
Kalau badan sabasar buntal
Inda payah pakai pamanis

Tiup api barumbun api
Asap kaluar simpang siur
Amun talihat lada api
Tais jua air liur

Ambur katupang dibuat umpan
Handak manyulam daun kaladi
Murung diri tumbang harapan
Bartahun mananti inda manjadi

Kaling indu pakai calana
Mausung padi singitlah bahu
Pungguk marindu di kala garhana
Rajuk di hati siapa yang tahu

Tanam salasih Kampung Simpudu
Pohon kapas saparuh tua
Barpasak kasih barpaut rindu
Tuan pargi ku lapas jua

Sungai bahal disiram tuba
Pisau balati buatan Kedah
Karam di laut boleh ditimba
Karam di hati tuhan yang tahu




Burung taripas tarbang malayang
Burung kiking patah sayapnya
Siang malam tarbayang-bayang
Orang dikanang siapa ampunya

Tidur malam mangigau-igau
Sampai batampang arang kuali
Sudah batah gadis kuingau
Orang diingau inda paduli

Naik piasau bawa ambulung
Makan kubal barurung-urung
Hidup umpama dalam tampurung
Mata tarlapas badan tarkurung

Kalip-kalip di Batu Arang
Durian tunjung patah bardiri
Apa diharap si anak orang
Labih baik ku undur diri

Pohon ampalam tunjung ka barat
Nipah barisi giok ambatar
Ati runsing sukar diubat
Salagi panawar balum diunjar

Gambus nangka bunyinya kuat
Balingkuk tajam pisau balati
Patah kaki boleh diubat
Inikan pula si patah hati

Ampuras piasau berpintal-pintal
Buah biabas dipilih-pilih
Aying mata mambasahi bantal
Orang diunjar indakan mulih

Lampuyang diuli-uli
Mari diuli dalam balanga
Ku lagau-lagau inda paduli
Orang dilagau inda mangaga

Manuang aing atas pantaran
Batang pasagi ditarah-tarah
Sudah nasib sudah suratan
Baguling-guling gugur ka lurah

Kain palikat ditapas-tapas
Duduk bakamban handak barsalin
Jangan dikanang barang yang lapas
Sudah manjadi hak orang lain

Puas kutanam si ubi rambat
Ubi dikandong kain palikat
Puas sudah aku taubat
Taubat nasuha indaku dapat

Dinukil Oleh: Awang Matasan bin Pengiran Mahmud

0 comments :

Post a Comment

Related Posts Plugin for WordPress, Blogger...
 
      faceblog © 2013 · re-designed by J. KingRaja           About · Advertising · Create a Page · Developers · Careers · Privacy · Terms · Faceblog Creator · Back to Top